《小傳日記》消費降級內需變內衰？Ｐｒａｄａ賣貴嘢業績卻唔衰

　　《小傳日記》普拉達（０１９１３）股價今日最多跌近一成至４８﹒５５銀見半年低，之後
有所回升，收市只跌２％，報５２﹒５５銀。股價今早之所以跌咁多，據報因為旗下品牌Ｍｉｕ
　Ｍｉｕ首席執行官Ｂｅｎｅｄｅｔｔａ　Ｐｅｔｒｕｚｚｏ將跳槽ＬＶＭＨ集團旗下
Ｃｈｒｉｓｔｉａｎ　Ｄｉｏｒ　Ｃｏｕｔｕｒｅ，出任董事總經理，將於１０月１５日生效。
　　Ｂｅｎｅｄｅｔｔａ　Ｐｅｔｒｕｚｚｏ於２０２０年加入Ｐｒａｄａ，主要負責普拉達旗
下增長最快嘅品牌Ｍｉｕ　Ｍｉｕ。一個ＣＥＯ跳槽，點解對股價影響咁大？皆因Ｍｉｕ　
Ｍｉｕ而家係普拉達銷售增長引擎。論銷售淨額，Ｍｉｕ　Ｍｉｕ今年上半年只佔集團總銷售淨
額２３﹒４％，但期內銷售增幅高達８５﹒９％，遠遠高於Ｐｒａｄａ品牌同期２﹒４％嘅增長
率。一旦有乜嘢風吹草動，隨時影響成個集團下半年嘅業績，難怪市場今早有咁大反應。
　　一個高層人事變動，係唔係會導致一個集團銷售大跌？我諗應該又未至於，除非主要設計師
拉大隊跟住走人，對品牌嘅衝擊或者要重新評估。
　　翻睇普拉達集團中期業績，上半年總銷售按年錄得１４％增長，包括中國在內嘅亞太區錄得
按年增長８﹒２％，而中國市場銷售額錄得中個位數增長。
　　奢侈品上半年在中國竟然錄得銷售增長？呢個事實可能有啲顛覆孖屐想象。皆因呢大半年，
一直聽到報道話內地零售銷售疲弱，消費降級之類。原本一杯２０至３０人仔嘅茶飲，要減半至
９﹒９人仔先有人吼，飲用天然水一支平均要減到八毫子人仔先有人要，就連機票都要鬥平，搞
到內地三大航空扭虧無期，半年埋單都要慘蝕。所以話內地消費降級，一啲都無誇張。
　　當然，你可能會話Ｐｒａｄａ係奢侈品，有佢嘅獨特性，其他品牌難以取代，不過咁都要有
錢有消費力先得㗎。除咗普拉達上半年中國市場錄得增長，ＬＶＭＨ首席財務官吉奧尼都講過，
就算亞洲市場（不包括日本）第一季度銷售收入按年下跌６％，但中國消費者喺第一季對
ＬＶＭＨ時裝和皮具嘅收入，按年仍然增長１０％，證明內地居民嘅消費力依然強勁，消費得起
奢侈品的有錢人仍然有唔少。
　　只不過呢種消費力可能愈來愈兩極化，喺經濟放緩嘅大環境下，愈來愈多中產階層要消費降
級，甚至向下流動改揸網約車送外賣，所以呢兩年好多內需股股價跌到殘，內需變「內衰」。但
Ｐｒａｄａ就輕輕鬆鬆示範一個華麗轉身，無放下身段同你鬥平，銷售額唔單止無衰到，仲錄得
增長添！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。