《魚缸博客》恒指早兩日見完十字，新一浪跌幅差唔多來臨

　　所以博客幾時都冇講錯，早兩日先話，特朗普「登基」首日，冇講關稅問題唔代表大和解，純粹係有更緊要嘅嘢做咁解；第二日就話加中國10%關稅，港股應聲回吐。

　　而家神州應對策略就係，你加幾多關稅，我人仔就貶值幾多，反正「中國調整人民幣的工具還有很多」，但同樣地呢一招都係會傷害到自身，特別對於本港經濟而言，人仔越平港股港樓都越難捱，今年港樓要跌幾多，博客真係唔敢估。

　　睇返恒指由18000衝上20000關之後，21號陰陽燭曾經見過十字，呢個升浪完結就肯定；關鍵係恒指守唔守得到？博客認為好似唔太得，一來呢兩日成交開始縮縮地，二來目前港股港指信心十分薄弱，相信新一浪跌幅好快來臨。

　　咁幾時會開始呢？博客覺得過埋年就會開始來料。雖然目前窩輪方面都幾平均，但睇到期指未平倉合約開始縮減，都係一個幾明顯信號，咁當然有機會可能大家想過年留返個錢所以平倉，但較大可能係投資者看淡後市。

　　點都好，如果想買跌，呢兩日可能係機會，新一浪跌幅差不多來臨，有貨的話建議先離場，博客建議就係咁。

《編者按》本欄搜羅即市傳聞，惟消息未經證實，《經濟通》亦不保證內容之準確性。