《小傳日記》B仔股之王登場！映恩生物首掛爽賺成皮嘢靠啲乜？

　　正當魚缸處於唔上唔落嘅危險狀態，都竟然仲有新股揀喺呢個時侯上市，仲要係隻B仔股映恩生物(09606)！但果然風頭火勢都敢掛牌係有啲底，結果全日較招股價高收一倍有多，每手勁賺11040元，掛牌第一日計升幅仲勁過集資王蜜雪(02097)。

　　事實上18A條例以來都上過唔少B仔股，但普遍都令孖屐相當之有戒心，因為好多B仔股上市未錄盈利，結果上完市一年又一年，都仍然係未錄盈利，商業化遙遙無期兼夾仲會配股發債等等，都令孖屐非常失望。

　　結果今次映恩生物就為B仔股爭返口氣，超購114倍，以新股嚟睇倍數唔算特別大，但喺近年B仔新股入面已經係好大，對上一次表現好啲已經要數到2021年上市嘅微創系微創機器人(02252)，都係得嗰15倍，咁就對比得到映恩係有幾咁勁。

　　睇返基本面搵吓映恩究竟勁喺邊度，據招股書睇到，映恩生物主要業務係偶聯藥物，即係同藥明合聯(02268)有啲類似，但映恩主要係自己研發為主而唔係CXO，相反仲係會幫襯CXO公司，所以順理成章藥明生物(02269)都係映恩嘅大股東之一，持股量5%，都應該喺業務上會有幫助。映恩生物主要四大生產線，包括免疫毒素抗體(DITAC)、雙特異性抗體(DIBAC)、免疫調節抗體(DIMAC)同獨特有效載荷抗體(DUPAC)，全部都係針對偶聯藥嘅精細分支，而雖然管線多，但好重要一點係過去幾年都無做過融資，即係過去三至四年入面嘅發展所需都係自給自足，呢一點係B仔股入面少見，都好大程度係引發孖屐追捧嘅重要原因之一。

　　唔止咁，除咗藥明係上市前投資者，基石投資者方面都響噹噹，總共15個重磅機構投資者，例如BioNTech、清池資本、易方達等等，都加強孖屐對於映恩嘅信心。數字方面，招股書提到目前公司已達成嘅交易總額已經超過60億美元，去到今年3月底就已經收到其中嘅大約5億美元預付款，即係未來嘅商業化收益都傾向穩定，可以話一上市就甩B在望。

　　今日敲鑼後主席兼首席執行官朱忠遠喺上市儀式提到，最快出年會有第一款藥物商業化，更加令孖屐期待之後嘅上市表現，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。