魚缸十連升告終，今日終於要跌近百點收場。但炒股唔炒市，跌市之下仍然有板塊炒起，一眾蘋果概念股今日全線拉升。
一大原因就係今日，蘋果將會舉行今年第一場發布會，主題係「Let Loose」，據講今次發布會唔太長，只係得半個鐘多啲，但邀請函上面幅插圖就就以大大支Apple Pencil作為主角，配以畫出彩色作為背景，如果以中文形容正正就係「妙筆生花」，相信今次Apple Pencil就係發布會重點。加上「loose」既有隨意嘅意思，亦有「鬆開」咁解，可能今次支新Apple Pencil將會有更加自由嘅用法。
雖然預計Apple Pencil係主角，但蘋概股有勢就炒，做鏡頭嘅舜宇(02382)又升，做喇叭嘅瑞聲(02018)又升。不過除咗如箭在弘嘅新Apple Pencil消息，今日仲有另一單蘋果消息更加值得留意。《華爾街日報》報道，蘋果正係自行研發AI晶片，而呢批AI晶片會喺目前iPhone、Mac機所用到嘅自研晶片嘅基礎研發。據報呢個「秘密任務」行動代號為「ACDC」，即係「Apple Chips in Data Center」，有埋代號就好似幾真，不過蘋果方面就無回應。
蘋果今年初宣布放棄造車呢趟渾水，慳一大筆如果話攞去開發AI晶片就唔出奇，畢竟科技巨頭去做返科技嘢，總比踩出界造車好得多，吃力兼不討好，反而AI係大勢所趨，而且前景有更加多可能性，開發AI晶片比開發新車著數得多。據講今次蘋果「ACDC」所開發嘅晶片唔係支援訓練AI模型嘅晶片，而只係運行AI模型嘅晶片，所以有意見認為將唔會同Nvidia爭生意。
目前好似ChatGPT嘅生成式AI模型都已經非常多，單係神州已經有百度(09888)文心一言同商湯(00020)日日新，與其再同人爭，不如做一套晶片係可以更好咁套用呢批AI大模型，因AI大模型講究時間學習，造訓練模型晶片先再開發AI，已經會比人遲，而家咁就爭少份，調轉頭畀人爭著Sell，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動
40,003.59
16,685.97
