2024年頭4個月，港交所有15隻新股上市，合計集資76.68億港元。不過，近期上市嘅新股，首日表現都強差人意。天津建發(02515)、茶百道(02555)、出門問問(02438)首日均破發，其中認購火爆嘅天津建發上市首日更加暴跌39%。
此外，華潤飲料、全品文教、宜搜科技、佰澤醫療、毛戈平化妝品等多家企業亦已遞表申請上市。芸芸申請IPO嘅企業中，毛戈平化妝品（簡稱毛戈平）算係比較特別嘅一家。今年1月初，該公司撤回喺上交所上市申請後，短短3個月便捲土重來。不過，今次戰場唔係上交所，而係港交所。
其實，今次已經唔係毛戈平第一次申請上市失敗。早喺2016年，毛戈平首次喺上交所提交招股就遭終止審查。之後該公司喺2021年10月再次衝刺IPO，但遲遲攞唔到證監會發行批文。於是公司於2023年3月更新招股書，卻一直無法進入問詢階段，最終喺2024年1月撤回申請。
有媒體猜測，毛戈平多次喺內地申請上市唔成功，可能同九鼎系有關。九鼎投資曾經接手毛戈平約10%股份，後來將持有股份全部轉讓浦申九鼎。2024年1月（亦係毛戈平撤回內地上市申請嘅同一個月），浦申九鼎將7.55%轉讓給帝景投資。另外，約1.47%轉讓給深圳篤實，餘下約0.99%轉讓給蘇州錦鴻。由於「九鼎系」掌門人吳剛頻頻被監管點名和處罰，喺2023年2月被處以100萬元罰款，並採取5年市場禁入措施。因此，市場猜測九鼎投資參投過嘅IPO或者受到影響。
如果毛戈平喺上交所申請IPO失敗後，轉頭可以喺港交所上市。咁係唔係代表港交所唔理會上市企業喺內地嘅一切瓜葛？定係港交所嘅監管條款比中證監更寬鬆？毛戈平可唔可以成功上市，成為「內地彩妝第一股」暫時未知。如果成功上市，或會為其他有同類背景嘅企業帶來啟示。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】內地再增8個自由行城市，餐飲業倡設大灣區身份證，以便利更多人來港消費，你是否認同？► 立即投票
40,003.59
16,685.97
