《魚缸博客》一個年年有錢賺又有息派，另一個無錢賺，你會點揀？

　　《魚缸博客》魚缸呢幾日非常熱鬧，皆因又到派中期成績表嘅時候，先有騰訊
（００７００），後有阿里巴巴（０９９８８）同京東（０９６１８）系。整體來講，成績都唔
錯，尤其係京東系幾家企業，中期盈利普遍大升。呢啲風頭躉，估計今日各大媒體都爭相報道。
所以，今日博客就唔趁熱鬧喇。
　　今日魚缸除咗有上述呢幾間大隻嘢之外，仲有兩隻軟件股同時派成績表。分別係金蝶國際
（００２６８）同中國軟件國際（００３５４）。金蝶中期虧損２﹒１８億人仔，比舊年同期虧
損２﹒８４億人幣有所收窄；而中軟中期純利２﹒８６億人仔，按年跌１８﹒６％。金蝶股價暫
時升緊７％，而中軟升幅２﹒６％。從市場角度來講，會覺得前者虧損有改善，所以今日升多啲
係應該嘅；而後者盈利倒退，股價唔跌都偷笑，所以升幅較小亦係理所當然。對此，博客無異議
。
　　雖然兩隻股票做嘅生意唔同，但始終都係軟件股，加上十幾年前，兩者股價差不多。所以，
博客經常攞嚟比較。睇返兩家企業過去幾年盈利，由２０１９年至２０２３年呢五年間，金蝶除
咗２０１９年賺過３﹒７２億人仔之外，其餘年年蝕兩三億人仔。相反，中軟呢五年間年年賺錢
，最少賺７億幾人仔，２０２１年最多試過賺１１億幾人仔。或者市場早已預見盈利增長，所以
當年股價炒到１６銀。相反金蝶２０２０年轉蝕３億人仔，股價由２０２０年的８銀炒到
２０２１年３９﹒５銀，市值破千幾億銀。
　　博客當年睇到眼都凸！雖然魚缸要落鑊炒總會搵到啲理由，不過，博客一向理智，睇業績最
實際。無錢賺又睇唔到賺錢希望嘅，一般都唔會落疊。一個過去幾年有錢賺又有息派，另一個無
錢賺無息派，但後者無論股價同市值都遙遙領先，你會點揀？所以，魚缸嘅情況有時就係咁奇特
，無論博客喺魚缸浸咗幾多年，都一樣睇唔明。當然，未來會唔會逆轉，博客唔敢講，但到呢一
刻，博客寧願揀中軟！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。