《小傳日記》點為之睇得又摸得？大搞「低空」但仍然有嘢未解決？

　　《小傳日記》香港政府呢幾年都不斷講低空經濟，不過市民一直都未見低空係低成點樣，但
其實一河之隔嘅深圳早已搞緊一年有多，港府終於喺噚日公布「低空經濟監管沙盒」，啟動禮上
特首李家超就話要令低空經濟「睇得見，摸得到」，都令市民非常期待低空經濟可以點樣「有得
睇有得摸」。
　
　　港府總共收到７２份沙盒試點項目申請，最後批出３８個項目，其中就包括美團
（０３６９０）出海品牌Ｋｅｅｔａ。身為國產袋鼠嘅Ｋｅｅｔａ近期先風騷踢走西洋袋鼠
Ｄｅｌｉｖｅｒｏｏ，打贏陸地戰唔夠仲轉打埋空戰，由個幾兩個月前喺香港註冊Ｋｅｅｔａ　
Ｄｒｏｎｅ之後，噚日終於揭開面紗，將深圳嘅無人機送餐服務引入香港，第一條航線就係由科
學園白石角長廊，飛到去對岸馬鞍山公園嘅「跨海線」。
　
　　美團無人機開始喺深圳穿梭嗰陣，當時都有探討過美團無人機喺香港嘅可能性，時隔一年半
，美團無人機真係飛入香港，但誠如當時預計，無人機暫時都仲未可以挑戰到樓高路雜嘅香港市
區，只可以喺「天高海闊」嘅吐露港上空來往。針對無人機嘅弱項，港府都開緊綠燈，運輸及物
流局局長陳美寶就話政府希望盡快喺第二季內將《小型無人機令》的載重限制放寬，令無人機可
以載得更重，甚至係載人。
　
　　為迎合港府發展低空經濟，但又有樓高路雜限制，順豐（０６９３６）都扭到橋參與埋一份
，同樣係針對「天高海闊」嘅飛行環境，順豐旗下豐翼開設三條航線包括「數碼港－長洲醫院」
、「數碼港－南丫島」、「長洲醫院－南丫島」，主要以運輸藥品及快遞為主，可以填補離島運
輸不便之餘，又避開咗喺市區難以起飛嘅問題。
　
　　講起無人機，旗下有匯天陸地航母嘅小鵬（０９８６８）今日都喺香港開咗第一間ｓｈｏｗ
　ｒｏｏｍ，雖然將陸地航母引入香港十劃都未有一撇，但開得ｓｈｏｗ　ｒｏｏｍ都係對本地
市場有興趣，如果無人機成熟到連陸地航母都可以喺香港起飛，咁低空經濟就真係搞得掂喇，不
過都係等美團送穩杯奶茶先，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。