《魚缸博客》阿爺出招機會大，汽車街唞完又可以炒番轉！

　　美國大選、議息結果都陸續出爐，剩低最關鍵就係人大常委會後有乜嘢宣布，市傳今日下晝開完會有大事發生，比起「Trump trade」嚟講，博客認為人在魚缸，梗係炒返「保5 trade」！
　　市傳人大常委等美國大選結果出爐後就會公布救市措施，呢個禮拜入面雖然仲算係觀望氣氛，恒指周內仲係困喺20000至21000區間之間，但中後期開始明顯風險胃納有所提升，指數雖然有上有落，但21000都已經有想破嘅動力，個別最有望係政策受惠嘅板塊，呢幾日都有熱錢炒作，不排除春江鴨已經趁呢一星期整裝待發，消息一出就可以起行。
　　市場預期今次救市焦點在於特別國債，如果真係如外界所講，資金規模達到10萬億，對孖屐短線走勢而言毫無疑問係特大利好；而除咗銀碼之外，市場都諗緊有無可能會提及全力發展創科嘅方針出現，主要就係由呢個星期熱炒嘅創科概念反向推測返嚟，所以「10萬億」、「人工智能」、「創新科技」都有可能係今次憧憬政策嘅重要關鍵詞。
　　近期車股大旺，擺脫年初嘅減價戰陰霾，電動車龍頭明顯已經從中發展出更強優勢，比亞迪(01211)、蔚來(09866)、小鵬(09868)甚至小米(01810)都先後發布令人興奮嘅月銷數據，就知新能源車大戰仍然有得打。乘著呢股車業風潮，市場明顯對汽車下游相關服務股份投放意欲提升，汽車代理、租賃以及車貸等等股份都好有鑊氣，趁今日回落，係時候跟炒一轉。
　　半新股汽車街(02443)上個月疑似出現烏龍盤，造價117.1銀都有成交，日內當然即刻回落，但10月下半月都有炒味上過40銀以上水平，隨後雖然回落至現價大約20銀左右，但都未跌穿5月上市價10.2銀，表現尚算強勢，如果憧憬車業好景帶旺下游生態，汽車街作為二手車買賣平台算係幾好炒嘅相關概念股。不過要知道炒味濃當然風險唔細，注碼要控制得精準，現價20銀附近不妨作第一注，有機會落17銀可落第二注，短線上望35銀都夠和味，跌穿14銀就要止蝕！

《編者按》本欄搜羅即市傳聞，惟消息未經證實，《經濟通》亦不保證內容之準確性。