RSS訂閱 阿爺又再出新政策，呢一水主要係對汽車，其中個人消費者轉讓登記在本人名下乘用車並購買新車的，給予購買新能源乘用車單台補貼最高不超過1.5萬元人民幣，購買燃油乘用車單台補貼最高不超過1.3萬元人民幣；報廢舊車並購買新能源乘用車以及購買2.0升及以下排量燃油乘用車的補貼金額不變。另外電器類「以舊換新」繼續，個堆就唔細講。
補貼有咩用？其實講緊鼓勵人多幾轉換下新車，刺激消費。但理想很豐滿，現實就好骨感，先唔好講有幾多人失業，我部車可能三年前先換，而家又再換？應該就唔太可能啦；如果想要換嘅人，幾年前開始補貼已經換左，所以已經無太大誘因再換。
所以今日A股表現解釋一切，經濟一差、失業率一高，出乜補貼都係假，多個錢都應該留係身上以防萬一啦下話？仲同你買車換電器換新手機？
或者換角度，其實呢次補貼未必係為大眾，而係幫緊內地班民企，須知道而家內地經濟係差，但民企銷售額仲維持正數，但如果連民企銷售額變成負數的話，呢個下跌漩渦就會變得好可怕。
如果你問博客呢一水有乜骨值得落場，博客認為不如留返幾個錢傍身來得比較好。你睇，恒指又見19100點關口啦，騰訊又被人沽，都係食下花生算啦喂。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【香港好去處】etnet全新頻道盛大推出！全港最齊盛事活動資訊盡在掌握！► 即睇
