《魚缸博客》速騰聚創今日有十幾億成交咁誇張？因為又炒AI概念

　　博客平時又都有跟開科技發展，對於唔同平台嘅科技水平都有了解過下，今日(3日)見到隻速騰聚創(02498)有十幾億資金炒來炒去，股價升成一成幾有多。原來，公司今日有發布會。

　　咁究竟發布啲咩技術咁巴閉呢？原來係講緊AI機器人，以博客了解，呢間公司專門做車載雷射鏡頭，精準度係行內都數一數二，而公司CEO邱純潮在接受專訪時表示，過去10年公司專注於做好機器人「眼睛」，未來將聚焦視覺、觸覺、電機等關鍵模塊，為AI機器人時代提供核心增量部件及解決方案。

　　目前以博客所認知，AI機械人嘅軟件程式，基本上都無太大問題，而機械四肢一路都攻克緊，博客認為已經到八成完整度；唯獨「機械眼」呢下難搞，因為如果用一般鏡頭做「眼睛」未必追得上程式嘅快速處理，而係機械人身上裝雷射眼呢？都有公司試過，但當中要做好多MATCHING，一直都唔見公司話自己成功，反而係個種「掃地機械人」就見成日運用。

　　咁又唔怪得公司股價今日升得咁犀利，因為「雷射眼」、「雷射鏡頭」本身都係一個寡頭壟斷行業，如果本身鏡頭技術成熟之餘，公司又有AI研發能力，仲要賣得平，咁一定贏到開巷，博客認為，公司之前股價炒到137.5咁高，對比起目前水平，確實仍處於低水，如果有興趣儲貨都可以考慮下呢隻，相信未來幾年所炒主題都離不開「科技」兩隻字。

《編者按》本欄搜羅即市傳聞，惟消息未經證實，《經濟通》亦不保證內容之準確性。