《魚缸博客》特朗普即將上任，黃金價格先高走一轉

　　踏入2025年第一個交易日，博客祝大家身體健康，今年搵多啲！不過今年股市係點，博客唔係太樂觀，特別早幾日睇到七師傅大戰湯文亮，得出個結論就係，股樓繼續係今年跌、跌、跌。

　　關鍵一點，就係美國後任總統特朗普即將上台，已經係一個政治不穩訊號，唔少大行預計明年聯儲局減息步伐減慢，因為新政府政策阻力可能會推動通貨膨脹，分分鐘調轉加息都唔出奇！因為美國通脹問題遲遲未解決到，所以令投資信心減弱，特別對於股票市場風險加劇下，2025年美股有無得繼續「GO、GO、GO」都係一個問題。

　　呢個問題點解決？買黃金啦！國際金價呢幾年已經破曬頂，根據世界黃金協會統計，2024年金價創下30多次新高，可見其實唔少人都繼續睇好金價發展，買比特幣會有大上大落，但買黃金，目前來講都好似只升不跌。

　　大行好似對黃金價格己有信心，特別係摩通、高盛、花旗預計，2025年黃金目標價可以去到每盎司3000美元，分析師相信因為貨幣市場所持有3.7萬億美元資產，將有一部分流入黃金ETF，加上黃金作為儲存財富工具，並唔會受到任何貿易戰所帶來對價格的負面影響。

　　今日博客都留意到唔少黃金相關股份都高走，博客認為如果想防守力強，買黃金股真係比較實際，畢竟今時今日個股市都無太大驚喜，買黃金／黃金股實際好多。

《編者按》本欄搜羅即市傳聞，惟消息未經證實，《經濟通》亦不保證內容之準確性。