《魚缸博客》科技股回吐係吸納機會？阿里愈跌愈買！

　　「淘寶99包郵」終於襲港，唔知你有無買埋一份呢？博客其實都係淘寶資深粉絲，睇返消費紀錄，由過去十幾年原來夾夾埋埋都買左十幾萬港紙，有啲買左好有用，有啲真係買左開都無開過，消費衝動真係魔鬼嚟。
　　過往阿里巴巴(09988)股價都因為「雙十一」銷售額而波動，不過近呢幾年已經無呢隻歌仔唱，皆因科技股受息口影響甚大，係中美都同時收水期間，香港科技股都無咩運行，係最近開始美國減息、中國降準，先叫有小小起色，咁阿里巴巴仲買唔買得過呢？
　　博客認為，港股先升後跌，之後都係浮浮沉沉，關鍵有兩點：恒指20000點關口守唔守得住；成交額大唔到。前者係一個重點參考指數，跌穿20000點無所謂，最緊要過後幾日可以升上去，加上大成交（例如半日成交有八百至一千億），其實係有種「換手」意味存在，係為下一輪升幅「築底」。
　　大行又點睇呢？國海證券發布研報稱，維持阿里「買入」評級，考慮到公司收入增速逐步修復，但仍處於核心業務投入期，調整盈利預測，預計公司FY2025-2027財年營收分別為10100億/11177億/12314億銀，歸母淨利潤分別為1019億/1238億/1433億銀，Non-GAAP歸母淨利潤分別為1582億/1724億/1968億銀，予目標價118銀。
　　所以阿里買唔買得過？博客覺得愈跌愈要買，因為而家有成交撐起大市，今日嘅「磨耐性」純粹係炒家鬥換手，只要有消息再落市場，股價就會再升起；特別係第二季業績出爐，可以係股價催化劑！

《編者按》本欄搜羅即市傳聞，惟消息未經證實，《經濟通》亦不保證內容之準確性。