《Online有話兒》微軟買TikTok，侵侵話華府要分一杯羹

　　呢兩日科技界最大新聞，就梗係講緊美國點樣威迫利誘，要字節跳動將佢哋抖音嘅海外業務「TikTok」分割賣畀美國買家，否則要喺9月15日前關閉。成日「撩交打」兼認叻嘅侵侵（特朗普）呢次又語出驚人，竟然話想同買家分一杯羹？

 

(Shutterstock圖片)

侵侵：呢次交易華府要「抽佣」！

 

(Shutterstock圖片)

 

　　侵侵呢次又出嚟認叻啦！話自己係促成呢次TikTok買賣嘅幕後主人，所以華府點都應該抽返Ｄ「油水」咁話：

 

　　「呢次成交應該抽返個大比數佣金，因為係華府做到嘢，無論抽幾多都好都要抽，呢個係我個人諗法，我個人認為好公平。」

 

　　簡單D講，其實今次件事係美國迫抖音賣走隻金蛋，你唔賣我就打爛你隻蛋，兼等你連蛋汁都無得食；而唔理你係買家定賣家，都係要畀返唔多唔少佣我。真係公就我贏，字就你輸囉！

 

TikTok本來連渣都無？原來係微軟做白武士？

 

(iStock圖片)

　　本來侵侵喺上個禮拜都已經好火滾，口口聲聲話TikTok呢類應用程式將資料運返去中國，要預備將佢完全封禁，因為白宮擔心TikTok會將美國用戶資料移交去北京。

 

　　TikTok講緊喺美國有1﹒65億次下載量（活躍用戶約7000萬），全球下載量亦高達20億。咁！侵侵要ban佢真係不無道理喎。

 

　　不過，微軟首席執行官Satya Nadella就同侵侵吹過水，話自己公司好有興趣買起TikTok，所以希望侵侵能夠高抬貴手。次後，侵侵先話9月15日字節跳動要賣走TikTok，否則就會禁止上線。

 

　　9月15日？！噢！距離而家仲有個半月唔夠，點樣估值點樣作價真係任由微軟開大口，真係冷手執個熱煎堆囉！

Lease and Tenant，我做大時你做細！

 

(Shutterstock圖片)

　　侵侵之後補充，對於微軟可能成功收購TikTok，是拜華府發功所賜：

　　「如果沒有租約，租客將一無所有。Well，某程度上我哋就係出租者，租個地方畀人做生意，所以佢地盤生意先會咁成功。」

　　擺到明要你分清楚莊閒！侵侵，你真惡！

 

撰文：李皆穎

 

 

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

 

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

 

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

【你點睇？】有傳怡和擬收購百佳超市並與惠康合併。你認為合併最終有否可能實現？你認為是否有需要透過合併超前整合應對市場競爭加劇？ ► 立即投票