《魚缸博客》跌浪未完重磅股要捱沽，滙控股價似乎有排跌！

　　之前博客講過，大市到目前為止都未見底，預計仲會有一波跌浪，而跌浪嘅形成，就不得不提重磅股份。

　　博客喺三月尾提過，滙控(00005)股價純粹係靠回購力度而升上去，而呢種升幅對於股市跌浪來講係不堪一擊，所謂「高處不勝寒」，滙控由90蚊跌落去70蚊呢下真係水瓜打狗，而滙控如果繼續想靠回購呢招撐起股價，博客認為某程度上係「送錢畀人使」，我甚至認為呢一刻應該暫停回購先係，等個市跌完先開始撈貨。

　　大行大摩認為，滙控首季表現強勁，可受惠於較低的存款成本以及強勁的財富和企業活動推動，不過，鑑於宏觀前景存在風險，市場更有可能關注剩餘三個季度的前景，預計未來收入將面臨壓力。下調對滙豐目標價由92.3港元降至83港元。

　　如果有聽博客講，係三月尾先套現再慢慢觀望，而家就唔使騰啦。如果無聽我講繼續持有，咁就要睇你本身買入價係幾多而決定，如果係三幾十蚊買，而家走都仲有得食，都仲有逃生門可言；如果你係高位80幾90蚊高追，呢一刻走都係輸兩成，遲下就好難講，所以博客都係建議沽貨為主，保留實力最緊要；如果80蚊持有，跌到落40、50蚊呢個位置，真係走都費事囉。

　　銀行業其實未來呢一兩年都唔會特別好景，特別係關稅貿易戰下，所帶動嘅蝴蝶效應大家都估唔到，好似滙控呢類重磅藍籌，跌市就一定沽佢先，同佢業務業績無咩特別關係，都係避開下好。　　

《編者按》本欄搜羅即市傳聞，惟消息未經證實，《經濟通》亦不保證內容之準確性。