香港嘅土地問題講極都仲喺度，而「土地大辯論」仲有一個月就完，社會各界對增加土地供應都有唔同嘅意見，不過都離唔開填海、發展棕地、用高球場起屋，今日Jenny就收到個好新穎其實又好老土嘅建議，就係住喺避風塘啲船上面？

潮流興復古 學做蜑家人

　　呢個建議係香港房地產協會講嘅，佢哋話想向政府建議喺舊啟德機場跑道北面內巷擺啲躉船，再喺船上放置貨櫃屋做過渡性房屋，咁咪可以短時間解決房屋問題囉！一聽完Jenny就淨係諗起，呢種咪即係以前水上人嘅生活？果然潮流興復古！

　　唔只復古，協會仲號稱呢個計劃有海景、有太陽能發電、係「平民化郵輪」添！副主席宋樹鴻同Jenny講，其實技術、安全都唔係咩大問題，因為佢哋提議嘅地方係舊機場跑道北面，個位就好似避風港咁，頂得住颱風嘅！而家最大嘅問題係啲人夠唔夠膽搬出去住，夠唔夠膽接受呢種咁創新嘅概念啫！佢相信都會有人鐘意㗎！只要裝修得好、有海景，Why not？佢仲話，呢個建議屬臨時措施，可能做咗幾年，等政府有足夠嘅土地建屋，就可以轉型做旅遊用途，好似轉做青年旅舍咁又得，得咗！

香港房地產協會話開完記者會就會交份報告畀政府～

一隻船住400戶 打風會唔會危危乎？

　　主席胡偉民就話，其實呢個唔係新鮮嘅概念，係外國都有好多例子，例如荷蘭咁，就係一隻船一家人，而佢哋嘅建議就係一個貨櫃一家人咁啫！至於可以安置到幾多人，就視乎想擺幾多隻躉船啦！佢哋份報告估計，一隻長400呎嘅躉船可以放置5層高、每層80個貨櫃箱，即係話一隻船可以放400個貨櫃喎！5層樓咁高，而且香港又成日打風，會唔會好危危乎㗎？

　　好多行家都有呢個疑問，胡生同宋生就係咁強調，個選址係類似避風塘咁，所以水面多數都好平靜嘅，加上佢哋會拋個錨落海固定㗎嘛！不過拋錨落海係固定條船唔會移動啫，有風浪號時候水面咪一樣係咁「o浪」下「o浪」下，而且上年香港都食正個十號波，今年又有個「蝴蝶結」風球，吹完又翻吹。真係整返個「浮動城市」喺個海嘅話，至少好似Jenny呢啲好易暈船浪嘅朋友仔就真係唔係好敢試啦！