一年一度嘅「渣打香港馬拉松」又嚟喇！Jenny今日有兩個好消息同一個壞消息同大家講。好消息係10公里隊制同埋全馬都會增加報名額、號碼布仲可以印自己個名；至於壞消息就係新一屆報名費再加價，而且唔再「一口價」350元，加幅由3%去到22%。Anyway，對咁多位跑友來講，名始終還是會報，係咪先？

今年首次向跑手提供可以印名嘅號碼布。(香港業餘田徑總會fb圖片)

10公里隊制賽名額增10倍

　　「渣馬」除咗係體壇盛事之外，其實而家已經演變成好似嘉年華咁嘅全民盛事，因為唔少選手都會扮鬼扮馬，有啲仲會乘機求婚，加埋路旁啦啦隊，成件事好歡樂！新一屆「渣馬」出年2月17日舉行，所有賽事嘅公眾抽籤報名，就會喺下個月12號上晝10點開始。年年「渣馬」Jenny都有唔少朋友仔報名，大部分都好好彩抽中，當然都有人抽唔中。

　　香港業餘田徑總會今日就有好消息宣布，話因應上屆10公里隊制及全馬報名反應熱烈，今年一於決定增加呢兩項賽事參賽名額，前者由1000個加到1萬個、後者就由4000個加到2.25萬個，但總參賽名額就唔變，維持7.4萬個。

號碼布印名 交換更有紀念價值

　　最得Jenny歡心嘅就係，大會玩Tailor-made今年首次向跑手提供可以印名（First Name）嘅號碼布，方便沿途支持者叫名打氣。即係小妹將會有一塊印住「Jenny」嘅號碼布做留念！大會咁做都幾聰明，跑手有獨一無二嘅記念品之餘，仲可以避免有人「請槍」代跑！

　　講時講，唔少政商界名人都鍾意去跑步，更加係「渣馬」常客。好似Package劉（劉鳴煒）咁，Jenny記得有一年，佢因為唔忍心一個女跑手無防水外套之下喺雨中跑步，就同咗個女跑手「交換」外套……聽到呢度，應該唔少姊妹都心心眼喇！Jenny就奉勸各位，努力練跑，如果賽道上見到Package劉，千祈唔好自拍阻住人，Say個Hi就好喇！追到Package劉一齊過終點，話唔定可以交換號碼布呢！

　　政制及內地事務局局長聶德權素有「官場跑友」之稱，係人都知佢熱愛運動，上屆為防癌會籌款，2個鐘零9分跑完半馬，唔知今屆會唔會再刷新個人紀錄呢？

上屆渣馬，聶局長跑完都有搵Package劉影相留念!(聶局長fb圖片)