「情人時節雨紛紛，路上寡佬無乜人」，西方情人節撞正中國元宵節，金融才俊如我，當然唔會同班宅男一樣於情人節宅在家，更無可能幾個宅男「圍威喂」，我這天當然有約，相約我的對象是我的初戀情人Fion。

　　「很感激以往二十多年陪我度過每個情人節的家人情人朋友，你們令我每個情人節都不孤單，以後的情人節，我會與我老公阿榮，開開心心的一直過很多很多個情人節。」台上穿著紅色裙褂的女子，對賓客舉杯道。當年向全班同學present讀書報告都面紅、怕羞鄰家女孩，想不到今日竟然變得大體，甚至做了人妻，真的是時光飛逝。

　　歷經幾場戀愛遊戲，任性、吹毛求疵、內向、外向，甚麼性格的女人都相處過，雖然不能夠開花結果，對方最終找到幸福，還是很樂意送上祝福。不過祝福是一件事，出席婚宴是另一件事，被炸不是問題，而是那些程序變得愈來愈流於公式化:童年照片組成的成長片段、永遠只有司儀自己識笑的笑話、還有口水愈來愈多的律師。

　　「喂，Steven ！好耐冇見！」

　　「伯母你好！你唔嗌我我差啲唔認得你，靚到咁！」當年常常放學和Fion到圖書館溫書，之後還當跟得男友送到家門，和她家人當時關係都不錯，Fion的爸爸於內地做廠，後來曾經和幾個行家夾份做馬主，想當年都曾經陪Fion入馬場撐場，可惜沒有一次遇到世伯拉頭馬。

　　「你同世伯身體幾好嗎?世伯係唔係仲一樣個個禮拜跑馬先?」

　　「係啦，咁多年都係咁。」

　　「平日已經個個禮拜嚟快活谷，今日擺酒都要喺馬會會所，係世伯嘅主意?」說實在，入馬場看馬就多，參加婚宴倒是第一次。

　　「呢個你就估錯喇，係阿女想喺返跑馬地擺酒，因為佢同女婿，就係呢度相識嘅!記得細細個你哋久唔久都嚟，睇我老公有冇得拉頭馬?」當然記得，不過馬仔次次都唔生性。

　　「後來隻馬退役，老公同幾個生意朋友又想夾份買返隻馬，中間幫手搭路嘅，就係我女婿!」

　　後來聽聞過，世伯之後那匹馬讓世伯拉了好幾次頭馬，那麼有眼光讓世伯過足馬主癮，難怪要求那麼高的世伯都對這個女婿讚口不絕。馬年常祝人馬上發達、馬上加人工等，原來馬上搵到老婆，真實例子想不到就在身邊!