申訴專員劉燕卿（Connie）月尾就任期屆滿喇！雖然話係月尾，不過今個月30、31號係星期六日，所以Connie返埋聽日（29日）就榮休了。臨別依依，Connie都同傳媒朋友舉行咗個茶聚，回顧下呢5年任期做咗啲咩，同埋對下一任專員有咩寄語等等。

主動調查每年6單變12單

　　Connie話，自己覺得可以擔任申訴專員嘅工作係一件好榮幸嘅事，而且喺呢5年工作入面冇乜遺憾，仲好開心可以將發表主動調查嘅數量由佢啱上任嘅每年6單，翻咗一倍去到呢兩年嘅每年12單喎！Jenny覺得佢完全體現咩叫敬業樂業！

　　佢亦都有信心就算佢退任之後，數量都唔會點變。佢又寄語繼任人、前警務處副處長趙慧賢，要秉承返公署嘅「公平、公開、無私、無畏」精神喎！

人手不足就唔去做　世上邊有咁便宜嘅事

　　不過講起調查嘅困難，Connie就話希望政府盡快立公開資料法（檔案法），事關佢哋做調查嘅時候，周不時都遇到有政府部門會以「冇資料啊」、「編制資料要好多人手資源啊」、「涉及第三方啊」嚟拒絕，雖然而家有啲部門守則容許佢哋用呢啲理由拒絕，但Connie就覺得今時今日咁嘅工作態度係唔夠嘅！佢講起都有啲激動，話如果件事涉及重大公眾利益，政府就唔應該拒絕公開，而且啲資料政府部門自己都有用，咁先可以知道發生咗咩事，冇理由因為人手理由而唔做㗎嘛！Jenny心諗，講得啱呀！冇人就唔做嘢，咁冇野會有人做啦！政府唔該認真諗諗佢啦！