書展去到最後一日，Jenny見唔少書商都做緊100蚊3本、100蚊5本甚至係100蚊6本！各位消費者精明眼有冇把握好機會，趁最後一日掃平書呢？小妹都有唔少收穫，相信嚟緊呢一年都唔駛去書店嚕！

波叔「阿茂整餅」就整得多，整芋泥又有冇試過？

　　而「財爺」陳茂波（波叔）今日都有獲邀嚟書展。平時啲嘉賓獲邀，都係乖乖地聽啲書商推介啲新書，而波叔就零舍不同，一嚟就話想搵本叫《為你烹調》嘅書喎。咦？唔通波叔都係隱世嘅烹飪高手？波叔就好玄咁講咗句：「啲人話係『阿茂整餅』。」引起全場爆笑！

　　波叔就話，原來本書係佢朋友之前喺書展買咗，佢記得有個故事係講有個囡囡為咗糖尿病嘅爸爸，炮製咗個低糖香蕉蛋糕畀佢食。因為睇到好感動，所以就對呢本書好有印象喇！

　　波叔仲話，佢囡囡都有整過帶子沙律畀自己食，到而家都仲記得「好好味」。至於如果問佢整嘢畀屋企人食嘅話，波叔就話想整潮州芋泥畀佢哋試下，因為一來自己係潮州人，潮州芋泥係其家鄉菜一種；二來就因為炮製潮州芋泥係好需要心機，由煮熟個芋頭到剝皮，壓成泥狀再加調味，點樣令佢唔好太甜、食落又滑、又要黏黏哋口，整到好味一啲都唔易㗎！聽波叔講到似模似樣咁款，又唔似「阿茂整餅」噃！