係人都知AO隔幾年就會轉吓位，政府上個星期就公布咗一眾高層官員調動，食物及衛生局常任秘書長（食物）謝凌潔貞（謝太）將於下月23日出任民政事務局常任秘書長；到時就由佢傍住「寧願一生都不說話都不想講假說話欺騙你」嘅民政事務局長劉江華喇！話說Jenny星期六出席NGO（非政府組織）活動時就撞到謝太，睇來佢應該係最後一次代表食衛局去主禮，講講吓原來佢同Jenny仲有好多時下年輕人一樣鐘意煲韓劇，真係估佢唔到！

肯身體力行去了解後生仔文化嘅高官唔多，謝太一話鍾意煲韓劇全場都表示驚訝!

謝凌潔貞：唔顧自己係冇人會顧你！

　　講一講個NGO活動背景先，其實係一個反性暴力工作坊，Jenny見佢個簡介話用戲劇教青少年保護自己咁有趣，有做老師的朋友去完仲話好有啟發性，所以就一於去參加吓。點知原來謝太係主禮嘉賓，大家可能會問同食衛局有咩關係？Jenny都解答唔到，不過謝太就親自解答咗，原來佢同主辦單位之一嘅NGO香港海景驕陽扶輪社同埋聖約翰教傷隊少青團素有交情，所以就出席撐吓場！仲話下個月調咗職之後，同NGO交流會更多。

　　本來Jenny以為做得高官，再做埋主禮嘉賓，一定講嘢好悶啦！點知謝太可能見台下都係後生仔女，一於「貼地」講吓愛情，傾吓韓劇。由於工作坊以話劇形式教人如何預防性暴力，謝太睇完都大讚得意，仲自爆「我都後生過，喺情愛路上都跌過，往後睇返，就知道要顧住自己，你唔顧自己係冇人會顧你！」姊妹們學嘢喇！

演員做話劇之餘仲會叫埋台下學生玩「案件重演」等大家從「實戰」中學吓點保護自己唔好蝕底比人。

AO都可以好「貼地」

　　謝太仲話為咗了解時下年輕人諗法決定跳出框框，個個月都去圖書館睇時下流行讀物，仲會煲韓劇同埋網絡小說，除咗同唔少人一樣都Like《太陽的後裔》之外，又推介講校園欺凌嘅《Who Are You－學校2015》，因為唔止劇情好睇，仲覺得好有啟發性。佢話兩個女都笑佢幾廿歲人都迷韓劇咁話。Jenny就覺得謝太咁願意走入後生仔個世界，第時轉咗去民政事務局，就可以一補佢老細劉江華嘅不足喇，你知啦，劉生喺後生仔心目中嘅地位……