上一期教授大家做了德國人最喜愛的酸椰菜，唔知大家有無試過呢 ? 

　　教得大家做酸椰菜，無理由唔教大家學做德國最出名的鹹豬手 !

　　正宗德國鹹豬手，皮層脆卜卜，肉質幼滑，雖然外表看來略為乾身，但入口就肉汁豐盈。豬手要焗到皮脆肉滑，秘訣是用麥啤浸一會及烤焗期間再噴上麥啤，因為麥啤糖分高，可令表皮變得金黃焦脆，肉質充滿麥香，口感更佳。

　　豬手皮脆肉嫩，鹹香惹味，通常佐以酸椰菜，有助消化，所以吃多了也不用怕油膩，而且豬手大大隻，適合與朋友齊齊分享。

　　聖誕節快到啦，大家不妨提早1-2天準備，在聖誕節當天焗製，可與家人或朋友一起共渡聖誕節 !

烹煮時間: 2小時

份量: 1-2人

急凍鹹豬手  1-2隻

月桂葉      3塊

白胡椒粒    1 茶匙

白醋        2湯匙

黑麥啤      500毫升

蜜糖        2湯匙（最後搽面用）

做法：

1. 豬手解凍後，放進煲內，加入月桂葉、白胡椒粒和白醋，注入水蓋過豬手，加蓋以中小火煮45分鐘。

2. 取出豬手後，放涼一會，用豬插或叉子在豬皮上刺洞。將豬手放進密實袋內，再倒入黑麥啤（留一小杯啤酒掃面用），浸3小時或浸1日，其間偶爾將豬手反轉，讓兩面都浸到啤酒。

3. 將浸好的豬手，放在烤架上風乾1小時。

4. 焗爐預先用220度預熱15分鐘。

5. 焗盆鋪上錫紙，將豬手放在烤架上，焗盤放烤架下，用來盛著滴下來的豬油。

6. 豬手放入焗爐內，用220°C將豬手焗15分鐘，然後將豬手取出，掃上一層黑麥啤，放回焗爐再焗25分鐘，再將豬手拿出，表面掃上一層蜜糖，放回焗爐用改用200度焗10分鐘或焗至表面焦香即成。

韋太小貼士：

　　食鹹豬手最好用酸椰菜拌食，減少豬手的肥膩。