與丈夫協議分居後，女友人S失蹤了好一陣子，大家都在猜，她是不是無法面對，索性把自己關起來避世。

　　事實也許並非如此，剛過去的周末，她主動邀請我們到她的新居迎月，還親手弄了幾個冰皮月餅做甜點，這顯然並非一個失意女人會做的事情，從前那個開朗可人的她，似乎沒有掉失。

　　S帶我們參觀新居時，還打趣說：「瞓咗雙人床十幾年，而家我終於可以一個人霸晒成張床，咁梗係要瞓queen size bed啦，你哋邊個想離家出走歡迎過嚟同我孖鋪。間屋我花咗差不多兩三個月裝修，全部都係我一個人嘅idea，唔使遷就人又無乜顧慮，而家嘅效果係我夢寐以求㗎，真係好開心！」我們都有點訝異，「好開心」這三個字說得自然，我們曾經害怕失婚會令她倒下，但看見眼前這個活得輕鬆愜意的美人兒，怎會估到她也曾是個事事依賴丈夫、需要細心照顧的小女人。

　　「其實等緊裝修嗰排我去咗台灣禪修，每日都係打坐、念佛，嗰段時間我無開電話，後來至知大家都搵咗我好耐，所以裝修好就即刻約你哋見面；你哋唔使擔心，我過得好好，去禪修都係自己一直想做，只係以前有個家唔可以話走就走。」

　　「我哋以為你睇唔開想收埋自己，你唔好再為咗個衰男人傷心啦，好彩無幫佢生仔咋，呢啲人唔值得你對佢咁好……」其中一位母親輩的朋友發言。

　　丈夫移情別戀，自然有大堆人挺身而出為被拋棄的一方抱不平，但S倒看得開，「我諗佢決定要同我離婚都需要好大勇氣，我會諗，佢的確有權爭取佢嘅幸福，只係我無辦法再參與其中，咁我咪去搵屬於自己嘅幸福囉，無論拍拖定結婚，兩個人之間總係要遷就同磨合，而家眼前有一個機會係我可以完完全全做返自己。」S說。

　　我們常常以為長大是靠日積月累的體驗，卻不知道真正的成長根本就在那一瞬間。

　　S沒有把時間浪費在懷恨、嗟嘆，相反她把握機會做盡自己喜歡的事情，但凡可以作主的東西她都不想再錯過。經歷如此一場鉅變，真的那此容易放下嗎？

　　「如果有人隨隨便便走埋嚟就可以破壞我嘅幸福，咁你覺得嗰種幸福本身存唔存在呢？好多人會執著要過完美嘅人生，但幾十年歲月點都會有瑕疵，跌低咗咪企返起身囉，個分別只係我唔想嘥時間坐喺度嗌痛同喊，亦唔需要任何人同情，我想即刻起翻身繼續行我嘅路。」S把這個階段形容為第二次人生，將不幸化成美事，確實要有一點睿智。

　　離開S家，那位母親輩的朋友再次發表其「肺腑之言」：「S真係慘，喺我哋面前都仲死撐，我話佢而家實係趁我哋走咗偷偷地喊……」

　　她的豁達真是如此難以理解嗎？抑或女人天生喜歡悲天憫人、抱打不平，可是這些似乎都不是S所需要的，給她一個沉澱的空間也許更為適合。我不能代S辯解，但我總相信女人堅強起來的時候，絕對可以超越自己的預計範圍，旁人又憑何質疑？