帶著矛盾去旅行 有得食又唔使肥TIPS

　　去旅行、食到盡！但日夜瘋狂無視卡路里狂食，只需幾日即可暴肥，一星期多3至4磅脂肪亦唔出奇，當中仲未計因食得「重口味」而水腫增加的磅數，你決定要食定要肥？ 

 

　　不用頭痕，只需跟隨營養師以下建議，即可放低「矛盾」，大啖食又不怕肥。 

 

 

大旅行致肥原因 

 

1. 一日六餐

 

　　希望在旅途中食盡所有美食，所以一日食足6餐，包括早餐、上午茶、午餐、下午茶、晚餐、宵夜、甜品時間，仲未計飲品同小食。 

 

2. 獨食

 

　　因為美食太誘人而選擇獨食，無論正餐、小食定甜品，一人獨享食物即等於一人獨享熱量，好難唔肥。 

 

3. 太天真

 

　　以為食幾日唔會肥，結果太放肆，回港才後悔莫及。

 

防止爆肥行動 

 

　　針對致肥原因，營養師陳筠霖（Krista）就提供了以下貼士，等大家可以精明地享受美食，減低增磅機會。 

 

１． 食飽飯

 

　　又話減肥又要飽，咁矛盾？無錯，正餐要吃碳水化合物豐富的食物，如飯、意粉、餐包等，而份量亦應佔一餐的最多，可減低飢餓感，避免在正餐以外的時間因食不停，亦可避免進食過多的肉類和脂肪。

 

２． 開心Share

 

　　正所謂「小食多滋味，多吃肥肚皮」，盡量與朋友分享當地的小食和甜品，可多淺嘗不同款式的美食，避免大量進食而致肥。

 

３． 飲水

 

　　大家應該選擇以清水解渴，而避免選擇有糖的飲，因為這些飲品容易飲用過量而不察覺，亦會愈飲愈口渴。

 

４． 擇肉而食

 

　　選擇較低卡路里的肉類，如海鮮、魚、雞肉等。

 

５． 少汁少油

 

　　有時候食物本身不肥，但烹調的方式令熱量大增，所以要盡量避免選擇以多油多汁烹調而成的食物。

 

６． 5份蔬果

 

　　衞生署建議成年人「日日二加三」，即2份蔬菜加3份水果，不但可以預防便秘，多吃蔬果補充膳食纖維，更可增加飽肚感，從而控制食慾。

 

７． 多走動

 

　　旅行期間多走動亦會有助卡路里的消耗。

 

８． 手信寧缺勿濫

 

　　避免買過多零食手信，以免回港後才因手信致肥。

 

台灣夜市免肥守則

 

1. 先選出幾款最想食的美食，然後當其他美食透明；

2. 避免選擇油炸小食；

3. 跟家人、朋友分甘同味，分肥同瘦；

4. 飲品應選無糖的茶類或清水。

 

日本刺身壽司陷阱

 

　　在日本最常吃的刺身、壽司不但新鮮亦可以吃得低卡，但當中亦有高卡陷阱，例如肥底的魚腩和魚籽。此外，亦要盡量避免選擇醬燒、芝士火炙、炸粉等方式製成的壽司，同樣會令卡路里大增。大家應盡量選擇蝦、蟹、章魚、魚背或尾部位的魚生，相對輕怡。

 

去泰國要識走醬！ 切勿椰水當水飲

 

　　泰國菜的口味重辣重甜，也有不同變化的醬汁和調味，令人不知不覺增加了熱量的攝取。大家可以選擇走醬串燒、海南雞飯、明爐烏頭等非煎炒炸而成的食物。另外，近年大熱的椰子水，雖然有助生津解渴，但每100克已有接近1茶匙糖分，不適合當水飲用，否則亦會飲肥人。