《Make Money》「疫」市創業系列：90後創港版波鞋，回本靠寄賣！

  　　疫情真係沒完沒了，連喺香港屹立３６年嘅ＵＡ都要執笠，相信唔少生意呢個時候都係吊緊鹽水。上集介紹過嘅外賣便當店都可以話係順勢而行，但疫情之下少咗人出街，呢個時候嚟賣鞋係咩玩法？原來呢次受訪企業「Good Supply & Co.」嘅五個股東，由細到大都對波鞋有情意結，於是就創立咗本地波鞋品牌啦！

 

五個「玩鞋」的少年，一人10萬圓創業夢

Joseph（圖左）負責設計產品設計。（李皆穎攝）

 

　　「Good Supply & Co.」嘅五個股東每人都有自己嘅正職，有投行分析師、有做Marketing等，但五條仔，又點樣可以坐埋一台一齊搞生意呢？股東Ivan話，皆因佢地係中學同學，男校嘅校服都係白衫白褲加對白波鞋，所以佢地幾個從小就對白波鞋有濃厚興趣。

 

　　畢業後2020年再見番面，大家都講起細個關於波鞋嘅點點滴滴，於是就把心一橫搞一對屬於香港人嘅波鞋，所以就一人拎咗10萬出嚟，然後各自發揮所長，有人做設計，有人做營銷，終於就做咗一對屬於五個人嘅波鞋啦！Ivan話，佢哋呢門生意喺上年８月份開始，原本以為疫情就快完，點知第四波又嚟緊，所以生意起初真係舉步為艱。

 

做寄賣反而有出路，月賣四、五十對！

疫情下吉鋪處處，但對於小本經營，租金仍然係難以負擔。（資料圖片）

 

　　每一個創業家想成功，就必須有一個「核心思想」，負責設計、另一位股東Joseph講，佢地產品嘅「核心」，就係唔搞太多花臣，回歸兩個基本字－「舒服」，波鞋唔舒服就講乜都無用！所以佢地嘅鞋墊設計係特登加厚，務求增加舒適感；另外一點，Joseph強調希望想用大眾都可以負擔嘅價錢，去買一啲經典且樸素又不失禮嘅鞋款。

 

　　另外，Ivan好強調，希望客人可以實體感受對鞋有咩感覺，所以佢地用「線下帶線上」嘅營運方式經營生意，但開間鋪閒閒地幾十萬甚至過百萬，於是佢地就同已經做緊生意嘅老闆傾傾，睇下可唔可以租個小地方寄賣，點知班老細又好肯幫年輕人創業，一口答應！

 

　　最後佢地嘅產品，可以出現係幾間大商場嘅鞋鋪同西裝鋪入面，租一個小小地方寄賣，老闆們收入多咗，佢地盤波鞋生意又唔使咁重本，而且鋪頭門面又高檔，不失牌子身份啦！聽聞佢地依家月賣四、五十對波鞋，銷售額每月平均三至四萬，扣除營銷支出，咁都好快回到本啦！

 

「疫」下創業最大困難：返唔到大陸睇版，速遞來回好花心機時間

 

　　不過萬事起頭難，疫情下創業就「難上加難」，Joseph就透露佢地呢款鞋係搵中國廠商製造，但由於疫情下去唔到大陸直接同接洽，所以設計、打版、搵材料等等，包裹速遞都來來回回咗十幾次，大大增加時間成本；單單幫對鞋開模都開咗三次，而開一次模都所費不非，但鬼叫洗濕個頭，唯有打掉門牙和血吞，先有今日呢對鞋出現！

 

　　另一方面，幾個後生都從來未接觸過鞋業，而且呢個行業入行門檻比起其他行業高，唯有搵返行家或者設計方面人士請教，邊行邊做，後生仔多數面皮薄，去請教人都唔係個個都得，反而咁樣就鍛鍊到對答同營銷技巧。另外，呢一行倉存同運輸成本都比較高，所以每一樣都要計好條數，真係督到計數機都爛。

 

夾份做生意「包拗頸」，用實際數據說服對方

呢個市況都賣到呢個咁多鞋，反映香港消費者有一定潛力。（李皆穎攝）

 

　　夾份做生意，最怕就係意見不合，五個人五把嘴，唔多唔少都會「包拗頸」心態，Ivan話，當初就因為對波鞋用咩顏色，都已經拗咗一大輪，最後唯有一人讓一步，主打三隻顏色，另外兩隻顏色就係「試驗模式」；但估唔到試驗個兩款顏色反而賣得仲好！用成績說服其他股東，或者係夾份生意嘅基本態度。

 

　　展望未來，佢地希望「做好個品牌」先，幾多間分店、幾多個營業額都係其次，正正因為年輕，所以就算「輸」，都唔會太痛，反而係吸收經驗的機會；錯得起，正正係呢次疫情下創業嘅最大優勢，連疫情都唔怕，仲有嘢輸咩？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇