《Make Money》科技古董新投資？電話Outdated咪掟住！

 

　　好多人都喜歡投資古董，例如字畫、花樽等，認為可以保值、甚至升值，不過原來近年來都好多人投資「科技古董」，你以為舊電腦、舊Gameboy無人要？錯啦，呢堆科技文物係古董市場有價有市，如果仲可以運行良好的話，分分鐘身價十倍！

 

蘋果「瘋」行：iPhone第一代

 

 

 （Shutterstock圖片)

 

　　講起蘋果產品，大家都可能有不同回憶，因為係2007年前，手提電話都仍然處於鍵盤介面年代，就算有觸控都靈敏度極差，直至2007年，蘋果推出第一部自家生產電話「iPhone」，往後改變手機潮流及方向，大家都畀佢個全螢幕觸碰介面嚇親！因為佢將實體鍵盤收起，並內置係系統入面，並且拋棄所有實體按鍵（除咗聲音及電源），用戶對呢個高靈敏度「螢光幕鍵盤」都感到新奇有趣。

 

當年Steve Jobs介紹將iPod、打電話、上網融合埋一個機器入面，仲收埋個鍵盤入Mon入面，震撼現場觀眾

 

　　仲記得美國舊金山人山人海嘅情景，首發4GB容量版499美金仍然搶購一空，而香港更一度賣斷市！但到2021年嘅今日，第一代iPhone可能已經唔支援好多功能，只有基本打出打入，但唔少人當係收藏品咁買賣！係eBay仍然可以見到，如果開過盒都仲賣緊7000蚊港紙，未開盒仲索價12000蚊！可見其產品保值真係無花無假！過多20年又會唔會有幾十倍升幅呢？

 

第一隻電子錶隨時貴過隻「勞」

 

 

當年做潮人同而家做潮人，都係需要一個字－錢。（網上圖片）

 

　　正所謂「出嚟行，無隻『勞』點得啊？」勞力士手錶保值就係人都知，但同你講電子手錶都好值錢你又會唔會驚訝呢？Hamilton公司係1970年代推出全球首款以電子數字顯示嘅腕錶「Pulsar P1｣，成隻手錶無機械機芯，又無手錶嘅「滴滴答答」聲，當時真係震撼全球人類！

 

 

　　而當年「Pulsar P1｣全球生產400隻，由18k金打造，當年售價2100美元，同當年一隻「勞」幾乎同價，真係富貴人士嘅玩意；不過呢隻電子錶係2021年今日仲誇張囉！係網上見到拍賣價一隻當年嘅示範貨版叫價55500美金(約43萬港紙），同一架車咁上下貴啦！

 

「過氣」電子玩具一樣值錢！

　　科技除咗改變生活，仲改變埋娛樂，好似第一代「他媽哥池」係1996年推出，當年原版由幾百蚊一隻炒到幾千蚊一隻，當年唔少父母都問：「好地地養真雞唔好？做咩養隻電子雞？」不過，呢隻電子雞都相當保值，如果係1996年推出嘅版本，今日都仲賣緊2500蚊港紙！　　

　　另外，全球第一部史上家用遊戲主機「Atari 2600」，應該係唔少70後回憶，不過當年香港應該引進唔多，畢竟都係富家小孩玩意，好難平民化，當年售價199美元，計及通脹後相當於今日766.79美元（約近6000港元）。不過最近網上有人放售主機連帶100隻game，索價就近五萬港元！所以各位媽咪唔好再話打機無前途，因為若干年後可能有「錢」途！

 

當年嘅Atari遊戲，而家睇好似好落後，但當年嘅小朋友已經覺得新奇有趣刺激！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動