明白明白明白——煩到抽筋

　　提提各位「老友記」，等於政府派錢的銀色債券， 三十號截止申請啦，除非你「嫌錢腥」，又或，財富多到覺得三厘半息太細微細眼，否則，快快將閒錢All In，攞到幾多就幾多！

 

政府發行銀色債券，乃「派錢」。除非「嫌錢腥」，否則，應用盡閒資認購。

 

　　三厘半息，乃政府包底。若遇息率向上，則派息更和味，因會自動向上追補㗎。

 

　　今次銀色債券降低到60歲可認購，必多咗十萬計人士，但政府有機會提升到三百億，理論上，大概應派到十至十四手。

 

　　剛剛，我將持有的iBond全部沽出，準備轉投銀債。發覺，賺佢三手八百幾元息，認真麻鬼煩，以後，可能唔再玩iBond！

 

iBond息低，買賣超煩，每人只分得三手「雞碎」咁少，但卻浪費大量認購時間。

 

　　萬事有個成本。大家不知可有我同樣經驗。

 

　　早前，政府公布發行iBond，小弟擁有匯豐卓越戶口，以為網上可以認購。原來唔得，必須親身到分行排隊等見客戶主任。一搞，連來回交通，冇咗個半小時。

 

　　對住位客戶及主任，當然要似電影《奪命金》中的蘇杏璇，聽一輪官樣規程，然後，不停回應：「明白、明白、明白！」，覺得自己似機械公仔。

 

買賣iBond要學電影《奪命金》中的蘇杏璇，猛講：「明白明白明白！」，有點荒謬。

 

　　結果，只分得三手！財經版話每手沽出有超過百三蚊，點知…冇！我以為沽出時可以似股票般在網上撳掣搞掂，原來唔得，冇癮！

 

　　於是，只好用電話找客戶主任。你以為想搵就搵到？難！電話不停傳來：「客戶主任線路繁忙，請等等！ 」重複又重複，十分鐘後，突變：「客戶主任仍然好忙，建議你稍遲再來電！」然後，Cut線！

 

　　吓，咁都得？

 

　　翌日，雞啼咁早（即九點一開市！）再打，終於通嘞。道明想沽清三手iBond。對方先報價，為$102.7875 ，百三都冇！算數，沽之哉可也。

 

　　對方撳一輪電腦，再問：「曾先生，你喺唔喺度？ （喺！）現在開始，請聽以下聲明……（朗讀近十分鐘……）請問你明唔明白？（明白明白明白！又蘇杏璇上身！）好嘞，手續完成，半小時會收到短訊！」

 

　　「主任，咁煩，點解唔可以似股票咁自己上網做 ？」

 

　　「曾先生，得嘅。不過要先到分行填表，聲明將債券轉做股票，五日後，就可以自己網上沽。不過提提你，轉變股票後，沽要收百幾蚊佣及手續費，計計埋埋可能唔化算㗎 ！」

 

　　即係，精的，仍要靠「明白明白明白熱線」，由購入到沽出，但覺程序多餘繁複玩謝客人。賺八百幾搞到身水身汗谷鬼氣，完全唔值得，下次決定唔再玩！

 

金管局發行債券，本為「利民」與「益民」。可否買賣設計上，避免變「煩民」呢？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情