特首跑馬仔愈近選委員選舉，氣氛就開始熱起來。CY乘住成功狙擊梁游氣勢當然係佔上風，幕後更不斷有人放料，打擊佢最主要嘅潛在對手財爺曾俊華。親CY媒體入面就有專欄引述「接近北京人士」消息，指曾俊華「得到清晰的答案，就是『紅燈』，即是說中央不贊同他參加特首選舉。」

　　呢頭咁吹完，另外又有媒體吹暖風，指財爺至今都未有收到任何顏色嘅「燈」，其實係「不支持，亦不禁止」佢去馬。噚日吹北風、今日吹返南風，風向日日唔同，不過來自建制嘅評論認為，只要阿爺唔落閘閘死財爺，已經係一種另類祝福。

　　Tina聽聞，財爺好早就已經埋咗自己班底，唔單止係幫手競選班底，更包括幾個如果當選後新一屆政府嘅重要職位。而佢嘅班底，唔少更加係CY一直渴求而不得已嘅城中精英，絕對唔係現時個別經常被揶揄「窩囊」嘅局長之流。財爺掌管香港財政咁多年，財金界脈絡當然係既深又廣，聽聞一位極高資歷、多年來亦深獲中央信任嘅本土Banker亦已經答允做未來財爺。

　　有政圈中人就話，睇返近周財爺個勢有所回落，身無一官半職嘅周融都獲得領導人級別嘅人大委員長張德江接見，但佢上京只係見到港澳辦主任王光亞，一拍埋真係比下去。再加上有親CY傳媒發炮話財爺畀阿爺出示紅燈，佢近排嘅聲勢更加相形見絀。不過財爺Sell唔到佢嘅個人能力，Sell佢嘅親和再加班底，未必唔能夠得到阿爺另眼相看。

　　呢位政圈中人仲話，上屆CY贏到都係打民意牌，佢都自知民意遠不及財爺，所以唯一勝選就係由阿爺拍板唔畀佢出閘。但財爺晒出佢嘅班底，班底質素又遠超CY雜牌軍，阿爺又會唔會一下閘住佢撇鬍鬚？下星期一(5日)立法會財經事務委員會有財爺講財政預算案，就睇下到時有無端倪。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票