幾經辛苦，曾俊華終於都可以被稱為「前財爺」，而佢亦喺辭職後一個月零一個星期，正式公布落場，參加今屆特首選舉。

　　曾俊華嘅宣布參選大會，同林鄭月娥相比，的確係正式、有格調好多，有晒Logo、有晒Slogan，有齊自己競選辦公室嘅職員撐場。不過公道講句，曾俊華辭職成個多月，早就諗好晒，相比林鄭搞競選工程，曾俊華一定有時間上優勢。

　　至於演辭，邊一篇係好邊一篇係壞，好難比較，因為兩人嘅方向明顯好唔同，根本一個係橙一個係蘋果。林鄭嘅演辭，主力係Sell佢嘅經驗同能力，曾俊華Sell嘅係佢嘅親和力；林鄭嘅演辭，係主要講畀1200位選委聽，曾俊華嘅對象就係700萬市民。無錯，Tina都覺得曾俊華嘅演說係講到入去我個心入面；但好可惜，我係一票都無，而我亦相信，好多聽完曾俊華演辭好想投佢票嘅人一樣，都係一票都無。

　　曾俊華依家明知自己處於劣勢，喺西環龐大選舉機器開動之下，佢要求建制選委嘅票難過登天。而根據港澳辦主任王光亞上個月提及特首人選四大標準，「愛國愛港、有管治能力、中央信任、港人擁護」，曾俊華就揀咗行港人擁護呢一瓣，希望可以單靠民意打逆境戰。

　　可能曾俊華仲記住上屆梁振英係點樣靠民意逆轉形勢，但可惜今次佢對手唔係望住泳池飲紅酒嘅唐英年，而係揸車都只係揸陳年前七嘅林鄭月娥。林鄭係一個工作能力極強嘅官員，就算佢民望不及曾俊華，日後甚至進一步畀曾俊華拋離，中央眼中，根本就唔係失分，同當年唐英年令阿爺丟臉，係兩回事。

　　西環選舉機器重點招呼嘅工商界，有界別選委向Tina透露，西環官員「曉以大義」時都講到明，民望高低唔係阿爺決定因素，只要高過現任特首梁振英就已經足夠，所以佢相信，林鄭只要穩打穩紮，唔使「好打得」，都已經贏梗呢場公平、公正嘅選舉。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票