《MakeMoney》投資元宇宙係未來趨勢，Facebook都想玩埋一份！

　　今年可算得上係「虛擬世界」進展最快一年，先有比特幣低位反彈再推出期貨ETF，證明虛擬貨幣有其真正價值；另一方面，「元宇宙」概念都開始多人談及，甚至Facebook都開始搞緊個宇宙，作為投資者又應該點樣投資呢個板塊，而虛擬貨幣又同元宇宙有密不可分關係，個世界真係變得太快啦！

 

 

元宇宙連Facebook都想大搞？

 

 （Shutterstock圖片)

 

　　早前《經濟不停學》專欄都有介紹過咩係「元宇宙」，所以相信大家都已經有初步認識。據外地媒體報道，美企Facebook計劃下個禮拜Connect大會上，商討有關公司改名嘅事宜，主要想等外界知道公司想建構「元宇宙」；改名後，社交媒體Facebook將重新定位為公司其一個「產品」，並負管理埋Instagram、WhatsApp、Oculus等程式。

 

　　而點解公司想改名呢？有業內人士分析，主要係因為Facbeook已經步入「老年化」，同時用戶在線時間慢慢開少減少，所以想希望透過建構「元宇宙」為社交媒體注入新動力，同時公司發行錢包同虛擬貨幣，預計會做一個深度結合，同時提升返年輕用戶重新投入Facebook。

 

元宇宙同蘋果手機、加密貨幣關係密切？

 

  （Shutterstock圖片)

 

　　由於元宇宙涉及增強現實（AR）、虛擬現實（VR）、三維技術（3D），簡單來說就係建構一個新嘅社會，人類可以係呢個社會入面天馬行空，用第二身分係呢個「宇宙」入面生活，而目前係軟件同硬件上做得比較好，就係蘋果公司啦！事實上蘋果手機係呢方面已經鋪排好幾年，已經有一定軟體配合，所以好多業內人士預計智能手機已經發展到盡頭，下一個手機進化應該都係往虛擬實境發展！

 

　　另一方面，虛擬貨幣都會係「元宇宙」重要一環，因為虛擬貨幣有「去中心化」特色，所以虛擬貨幣作為「元宇宙」嘅交易貨幣係較為理想，由於區塊鏈技術令虛擬貨幣有不可篡改性，令成個生態系統都較為安全，加上現代人類同政府之間嘅不信任度增加，元宇宙中採用虛擬貨幣為交易貨幣可以避免受到政府監管，令成個宇宙無限性大增！

 

藝術發展進入新階段，NFT將再進化

 

  （Shutterstock圖片)

 

　　由於元宇宙除左遊戲之外，更多嘅係為人類提供一個「平台」，呢個平台可以係貨幣交易、藝術創作等，而家嘅NFT （Non-Fungible Token 非同質化貨幣）相信係元宇宙再進化，藝術品可以化身為NFT；係元宇宙舉行演唱會，NFT又可變為通行證；如果元宇宙係可以俾人建構虛擬空間，NFT又可以化身為空間擁有人證明，總之有無限可能性可以發生。

 

　　係可見未來，係元宇宙世界入面，一套衫、一間屋、一間公司都可以利用到NFT技術，而大部分NFT都係以太坊平台上建構，以太幣有機會係元宇宙發揮一個重要角色，今日以太幣先係3800美元水平，唔知第日會唔會變成第二個比特幣呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情