【玄來有樣睇】腳底有雷，屬於超級行動型？

　　世上有火龍果，也有火龍女。

 

　　「明日我將會做一件十年來未做過嘅事！」她上周六宣佈。

 

　　「結婚？」我猜。

 

　　「唔係，係遊行！」

 

　　「你平時咪專心搵銀，政治免問嘅咩？」

 

　　「今次真係唔得，我叫咗成千人去。當然，佢哋去唔去我唔擔保。」

 

　　火龍女的動員能力，過去證明超班！

 

　　六月時，其閨蜜團開演唱會，是師生同台那種玩票騷，竟有一位穿得自以為燦爛而全人類都覺得爛的阿姆，無論別人唱悲情的樓台會、或跳柔情的華爾茲，她都在旁邊自動獻身伴舞，件衫已經碎片珠片紛飛、舞姿更是甩皮甩骨，觀眾都很納悶，火龍女一個箭步飆上台，奮力扯瘋癲婦入後台，一面說：「你手機響呀！」

 

　　婦人回到後台，當然「發爛渣」：

 

　　「我都係表演者，點解唔可以上台？」

 

　　「未到你上台吖嘛，你做乜映來映去？」

 

　　「你係邊個？關你乜事？」

 

　　「你唔駛知道我係邊個，總知出面有一半觀眾係我叫嚟嘅！」

 

　　婦人見火龍女氣勢逼人，不敢再吭聲。表演當日是端午節，火龍女指示朋友們六時吃飯、七時半看騷，實在不容易。

 

　　她不只有氣勢，還有實際，十幾歲已經去「劈友」——劈自己友！話說她的爛賭哥哥敗了家業，累得父親差點「瞓街」。她得悉後立刻「狂丙」哥哥，打斷了他一條腿、後遭警方拘留，她的男朋友及時「勸喻」原告：如果不想另一條腿都報廢，就放棄起訴。結果她獲釋。火龍女就是如此轟烈！

 

　　這樣迅速行動、result–oriented的性格，其實已寫在臉上，相學表徵有三：

 

（一）眼神露：做事果敢，行先死先，在所不計。

（二）下巴堅：下庭有力，實行能力強，要做就去做。

（三）聲音大：她中氣中足，演唱完全不用咪，嗌交肯定先聲奪人。

 

　　聲音助長氣勢，所以有朋友說：

 

　　「火龍女行緊過嚟，你一定feel到。因為佢腳底有雷！」

 

火龍女陽氣十足，特別愛日出，最近拍得此佳作。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】以伊衝突升級，北韓派兵增援俄羅斯，你會否擔心世界發生大規模戰爭？► 立即投票