從食垃圾到坐擁千萬的相

　　藏龍伏虎。

 

　　從後面睇都覺得有霸氣。

 

　　霸氣的士司機見我好傾，坦言嚴格揀客。

 

　　「我揸咗廿年的士，三唔載：樣衰唔載、截車姿勢唔正確唔載、玩眼神唔載！」

 

　　我暗中滴汗，幸好通過其樣貌測試，否則仍然企緊喺十字街頭。

 

 

　　「截車姿勢點樣算唔達標呢？」我問。

 

　　「有D人懶有型，遞咗一次手就算數，又或者柔軟無力，好似同空氣溝通咁。我一於飛佢。」

 

　　「D人又點玩眼神呢？」

 

　　「嘿！有D人企圖用眼神截車。」

 

　　「咁都得？大家距離咁遠。有時車頭玻璃又反光，大家點睇對方眼神呢？」

 

　　「有D西裝友，喺女朋友面前扮Cool，以為瞄一瞄你，你就自動停低。」

 

　　我坐喺車後觀察覺得佢個頭大，頭骨唔錯（即係唔凹、唔扁、唔歪），應該係有腦之人，照計有創富能力喎。不過耳仔偏細，究竟佢有乜故事呢？

 

　　「你頭骨都幾靚，搵錢應該有D辦法喎，你係咪Hea呢？」我一於用激將法。

 

　　「梗係唔係啦。我好捱得㗎！你信唔信吖，搵過垃圾食，成盒干炒牛河，擦哂！」

 

　　「點解攪成咁嘅？」

 

　　「我離家出走囉！因為阿媽逼我去補習，補習先生除淨我底褲打我，我讀書唔掂，半年冇番學，跟住失咗蹤，露宿街頭，執垃圾食。我出走時對阿媽講：撈唔掂我唔會番去見佢。」

 

　　「結果呢？」

 

　　「十九歲揸的士，廿七歲買的士，現在有三架。我同老婆講：如果我走咗，你就自己要一架、一架畀我家姐、另一架你自己處理啦。我老姐十幾年前借咗一萬蚊畀我買車，從來冇催過我還錢，十年後我十倍奉還。我仲同老婆講：記得畀架的士老姐呀，無謂我夜晚黑番嚟搵你吖！」

 

　　嘿！都幾有蹺。難怪！頭骨立體，有諗頭，可惜耳細而兜，傾向反叛衝動，致令自己捱苦。頭大耳小，就算從後面睇，都知係辛苦創業型啦，不過頭大始終有著數，佢至少都幾千萬身家啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好