民建聯早早已經推動「變革香港」呢句口號，相信唔係呢個第一大黨前瞻能力夠強或者洞悉先機，而係阿爺一早已經安排佢地做先頭部隊，部署一場香港回歸以來最大嘅政治體制變革。

　　喺北京舉行嘅人大政協會議，為呢場變革展開序幕。全國人大常委會副委員長王晨介紹有關修改香港選舉制度草案時就話，要調整優化選舉委員會，建立有香港特色嘅民主選舉制度，重新構建選舉特首嘅選舉委員會，同時要修改行政長官及立法會產生辦法，日後選委會將獲賦權產生「較大比例」嘅立法會議員。

　　從呢個講法，大家都好清楚睇到阿爺嘅脈胳，就係透過佢能夠全面操控嘅選舉委員會，更加牢牢掌握行政長官選舉，以至整個立法會嘅組成。今次Tina放低選舉委員會點樣變革唔講，集中講下立法會。

　　立法會現時70席，35席嚟自地區直選，35席就係功能組別；如果將功能組別嗰5席超區都計埋係直選，直選議員比例就達到40席。今早已經有消息喺政圈傳出，阿爺諗住立法會議席由70加到90，而喺直選同功能組別以外，會加多一個類別係選委會產生；如果從三個組成部分共90席計，大家咁高咁大，各佔30係好合理推斷，但從王晨今早所言「日後選委會將獲賦權產生較大比例立法會議員」嚟睇，似乎選委會揀卒嘅界別，將可能多過30席，變相會縮減其他兩瓣嘅議席。

　　之後Tina再搵建制派打聽，最新版本就係，功能組別肯定會剔除超區5席，其他維持的話，30席就無走雞；直選方面極有可能重新劃過選區，每區雙議席單票制，咁極可能就係得10個大區共20席，較現時嘅議席數目大大縮減；而30加20席以後，選委會選出嘅議席，將會係40席之多，成議會嘅「最大群體」。正如Tina前兩篇文所言，阿爺將會設立一個「考牌」制度嘅資格委員會，要得到委員會嘅資格先能夠參加區議會或者立法會選舉，建制消息就話，咁計法就算泛民真係入到閘參選，佢地直選拎到嘅議席將會縮到最多得10席，佔整個立法會嘅九分之一，政治聲音同空間將會大大縮少。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票