世紀疫情之下，所有嘢都變得非常政治，政治人物一言一語，甚至記者嘅一個問題，都可以將人、團體、地方捲入政治旋渦。香港電台一位女記者喺訪問世衞助理總幹事艾沃德時問咗一句：「是否會重新考慮台灣會員資格？」艾沃德擘大個口得個窿嘅樣，觸發新一浪政治暗湧，記者本身、港台、政府以至世衛都被捲進。

　　為免地盤一樣被捲，Tina先說明立場，兩岸問題係非常複雜嘅議題，單單係「九二共識」嘅爭議，睇幾日都睇唔晒，但Tina係好堅定咁同大家講，我係支持「一個中國」原則。

　　咁返返去個問題，「是否會重新考慮台灣會員資格？」呢一個問題，點解要商經局局長邱騰華動用到最猛火力去炮轟港台？

　　提出問題係記者嘅天職，喺信奉新聞自由多年嘅香港，更加無聽過政府官員要為記者嘅問題設限制，就算係出緊政府糧嘅港台。以今次女記者嘅問題嚟講，當然係一條紅線問題，大家心知肚明，但其實Tina想強調，「問題」永遠唔係喺問題本身，而往往係喺答案到。試想想，如果艾沃德當刻斬釘截鐵咁回答：「做世衛正式會員要先有聯合國會員身份，看不到台灣加入的機會」，事件又會唔會發酵到今時今日地步要邱局長開腔？我好肯定唔會。

　　另外，同一條問題由唔同人去問，效果亦大大不同。試想想，問問題嘅係內地記者會點？好明顯啲人就會覺得佢地咁問就係要借世衛官員把口重申一個中國原則不可撼動，又會唔會有人質疑內地記者支持台獨？所以到呢一刻Tina都認為，問問題嘅港台記者何罪之有？有罪嘅係咁簡單問題都唔敢答嘅世衛官員，係苛責記者嘅邱騰華。

　　有政圈口痕友就話，邱騰華由以往幕後軍師，今次一轉上前線衝鋒陷陣，仲要係反應極快，除咗係港台近來真係畀左好多麻煩香港政府之外，佢亦似乎準備好仕途更上一層樓，「目標最少都上一級去到政務司司長」。 口痕友就話，之前政圈已經盛傳今年第一季政府高層會有變動，但一個疫情將所有計劃擱置，但變動最遲都會喺立法會選舉之前進行，以增加建制派喺選舉嘅籌碼。所以口痕友估計，邱騰華撲出來咬住港台唔放，好肯定係要鞏固自己嘅仕途，做好張成績表等上位。

　　聽落合情合理，但Tina聽到「最少上一級」呢句，都同口痕友暗笑咗一下，真係唔使劃出腸嘅。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】美國總統大選在即，你認為誰將最終當選？► 立即投票