下周一(29日)就係立法會補選提名期結束日，臨近結束，消息就愈傳愈多，剛剛就有不同媒體分別引述消息人士指，分別在九西同港島報名嘅姚松炎同香港眾志周庭，都會被選舉主任DQ（取消資格），連閘都入唔到。

　　呢個消息，雖然對好多人來講，特別係泛民嗰邊都唔多意外，因為呢個真係容易預計過港交所炒高過$300；如果估計唔到，九西就唔會搞到「Plan B馮」自己落馬，要去到Plan C身上喇！但對Tina嚟講，如果真係如報紙所言，下周一兩人齊齊被DQ的話，就的確係感到意外。

　　自從補選開始報名以來，Tina同唔少親政府人士打聽，都收唔到姚周二人真係會被DQ嘅訊息。建制派，甚至係政府內部主流意見都認為，姚周二人並非「罪犯滔天」，當時估計就算畀兩個人入閘，阿爺都未必有太大意見。政府方面，最近咁啱碰上鄭若驊僭建事件令到林鄭政府有少少進退失據；如果再搞埋DQ姚周二人，勢必激起更大民情。建制派方面，就更加擔心DQ二人會激起更多中間選民嘅同情票，到時泛民唔好話派「二打六」，搵「三打七」出來，都打到鄭泳舜、陳家珮落花流水。

　　咁最終點解DQ二人由半信半疑發展到依家言之鑿鑿？聽聞政府走到呢一步，真係迫不得已，係兩人都各自有迫不得已嘅理由。先講姚松炎，當日佢宣誓被裁定違反基本法，更加係觸動人大釋法；雖然釋法之中只係話「並不得重新安排宣誓」，照字面解應該係不得就2016年選舉安排從新宣誓，但「大人」嘅心思難以揣摩，不排除容許姚入閘再喺今屆立法會宣誓，畀一眾建制律師師爺同阿爺打小報告話違反之前人大決定，惹來更嚴重嘅法律風波。咁多不確定性之下，長痛不如短痛，「揮劍斬松炎」。

　　至於周庭所屬嘅香港眾志更加係令阿爺頭痛，特別係羅冠聰同黃之鋒。眾志個個都係後生仔女，今屆唔選得、下屆唔選得，再下屆都難制止，唯一可以做嘅，就係立一個先例，指佢地黨綱「自決」字眼係違反擁護基本法，咁以後就大條道理阻止佢地「眾志成城」咁去參選。

　　無論如何，今次補選將明確定下日後立法會選舉嘅入閘準則，對阿爺而言係好事，對擁護一直以來選舉制度嘅港人來說就……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【雙11感謝祭】雙重優惠、多買多賞► 了解詳情