星期三（21日）林鄭同佢團隊亮相之後，Tina同男友有一段非常「有營養」嘅對話，喺度同大家分享一下。

　

　　Tina：「真係難怪涂謹申話呢班係二流團隊，又話咩要創新、要破格，最終一班高官唔係熟口熟面，就係由副坐正、由AO變問責，得一個羅致光係局外變局內，咁嘅團隊，講二流已經算係畀面喇。」

　

　　男友：「人哋任都未上就話人二流，都好唔公平喎！」

　

　　Tina即時插咀：「當日梁振英未上台你都叫人落台啦！話我…」

　

　　男友：「咁都證明我無睇錯佢，佢依家都連任唔到啦！」

　

　　Tina：「得得得，啲衰嘢唔好再提，咁點解你覺得呢班出年平均年齡已經係花甲之年嘅團隊唔係二流？」

　

　　「我用足球打個比喻話你知…」男友個懶係淡定嘅樣，令到我要藐咗佢一下，佢繼續道：「如果我將一隊球隊，每個位置都用全世界最叻嗰位球員放入去，係唔係就係最一流球隊？Teamwork一流定二流，Team入面每個人嘅質素當然係好重要，但有時Team Spirit（團隊精神）更加緊要，而Team Spirit係要由領袖、一般嚟講係領隊去提升到最高，有好嘅領隊，一隊牌面只係值80分嘅球隊，踢高20%就去到96分成為一流，所以關鍵就係領導嗰位。二流領隊都會將一流球隊變二流。所以大家只係要問一個問題『林鄭月娥係唔係二流長官？』」

　

　　呢個的確係一個非常難答嘅一個問題。喺林鄭仍然未做政務司司長之時，佢好打得嘅形象真係深入民心，我相信以佢咁多年服務香港嘅經驗，加上過去五年梁特政府施政嘅前車可鑑，如果佢係有足夠空間去發揮去管理香港，佢點都唔止係一個二流長官。但大前題喺，如果喺佢揀自己嘅人腳都傳聞受到咁多制肘，佢會有足夠空間嗎？

　

　　個團隊一流定係九流，決定權從來都唔喺香港身上…

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇