AA制辯論比賽

　　猶記得在那個湮遠的中學年代，曾經於中文課本裡讀過一篇名為《請客》的文章。作者王力生於中國廣西，大學畢業後再往法國進修；當他於回歸祖國後，有感當時社會風氣流行「小往大來」，遂以《請客》一文來諷刺虛偽的中國人，嘲諷他們的功利和謀略。

　　《請客》的寫作背景源自上世紀四十年代。時至今日，貪腐依然猖獗，人們改不了「拋磚引玉」的德性；不同的是，請客這舉動在男女關係當中，又有另一些特殊意義。

 

　　「AA制」是甚麼？毋須再三解釋了吧！（未聞者請參閱四月廿五日港聞版）

 

　　初相識的男女因為晚飯結帳問題而發生肢體碰撞，如果王力先生還在世，不知又有何感想。

 

　　起初案件被認定為男人要求AA制，望女方能夠攤分帳單，男女雙方不斷被網民數落，大罵男的吝嗇小家，女的「呃飲呃食」。翌日早上，店主急忙釐清事件，事源女方打算AA制付帳，男方卻登時「龍顏大怒」，並把現鈔撕爛……還原真相後，大家又改口讚揚兩位性情中人很「可愛」，難得雙方都如此堅持。

 

　　那些評價，不就是活脫脫的社會縮影嗎？

 

　　《男女之間是否應該AA制》向來都是一直沒有定案的辯題，難度在於兩方關係上的變化：朋友、曖昧、戀人。而在社會鼓吹男女平等的風氣下，平等又是否能應用於帳單上？

 

正方－男女應該AA制

 

　　男：「無論邊個階段都好，如果女人有能力，係咪都應該出返一份呢？莫講朋友食餐飯，有時拍拖同居，租/供樓水電煤佢哋好似奉旨覺得係男人嘅責任，但其實呢個係好自私嘅想法。尤其而家生活指數咁貴，女人一方面剝削男人，另一方面又諸多要求，唔想再被人批評港女，就應該改變呢種攞盡著數嘅心態。」

 

　　女：「如果大家係朋友關係，我覺得好應該AA制，因為一旦有金錢轇轕，恐怕對方會希望喺你身上攞返回報，堅持夾錢都係想大家互不相欠，以免對方會對自己有其他意圖。如果發展中或者拍緊拖，夾返一份錢我覺得無所謂，假設將來都會一齊組織家庭，咁大家嘅共同目標可能係儲錢買樓，如果用晒佢啲錢，等於離開大家成家嘅目標愈來愈遠。」

 

反方－男女不應該AA制

 

　　男：「如果大家係朋友關係，都唔會經常見面，一餐半餐請佢食飯又何妨。追求緊嘅就當然要落啲本錢，咁唔通追到手拍緊拖至開始叫佢夾返份咩，我能力上做得到嘅，都想照顧到佢。最重要係，做男人要有尊嚴，面子攸關，我唔想大庭廣眾將啲錢塞來塞去！」

 

　　女：「我覺得做男人應該有風度，堂堂男人，唔該唔好連食一餐飯都咁斤斤計較。約得我出去，係咪預咗請得起至會約呢？唔使佢請轉頭又話我唔畀面。由我阿嫲嗰代開始，男人都係金錢上照顧女人，而女人就負責打理好頭家，唔通我執屋洗碗然後又問佢收返人工咩，大家之間點可以計得清楚……」

 

　　無論立場在哪方，人與人之間最和諧的相處模式就是「物以類聚」，約會前請先探聽對方口吻，甚至清楚說明自己的堅持，總好過在最後關頭大打出手！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情