自爆闖影圈收入減少 姜濤為角色學踩單車

　　【晴報專訊】男團MIRROR「人氣王」姜濤昨日與隊友王智德（Alton）及ERROR成員何啟華（阿Dee）出席活動，吸引數百名粉絲到場支持，場面墟冚。即將與毛舜筠和隊友柳應廷（Jer）拍攝電影的姜濤，被踢爆為新片才剛學識踏單車，他尷尬表示︰「22年嚟都無踩過單車。」

 

姜濤將開拍電影，但他表示角色要保密兼不能劇透。

 

　　姜濤、王智德及何啟華昨日到尖沙咀出席「可口可樂飲樂起勁見面會」，為睹偶像風采，有粉絲清晨四時已到場霸頭位；三子出場時，全場尖叫聲不絕。三子在台上分別與女粉絲玩遊戲，姜濤更與粉絲派心心及擺出心形甫士，但最後「羊群」（阿Dee粉絲）的尖叫分貝以一分之差擊敗「姜糖」（姜濤粉絲），阿Dee受訪時笑言︰「我啲粉絲平時有練開獅吼功。」提到姜濤擺甫士時一臉尷尬，姜濤解釋︰「我無諗過出道三年派心派到依家，所以有啲怕醜，但都好開心有粉絲同我一齊做。」

 

（左起）Alton、姜濤及阿Dee出場時，台下尖叫聲震耳欲聾。

 

　　談到將與隊友柳應廷拍電影，姜濤透露為準備拍攝，最近少接了其他工作，問他收入減少可有肉赤？他說︰「都OK，都夠。」Alton即笑指︰「佢生活重點唔係錢，最重要係靚仔有型。」阿Dee則大爆姜濤剛學會踏單車，姜濤表示︰「因為套戲我要踩單車，噚晚（前晚）終於學識，我22年都無踩過單車，又無朋友同我一齊踩。（今次有人教你踩？）本身叫朋友教，但踩踩下自己都識。（約女仔踩單車？）未車得人，遲啲先。」

 

阿Dee護保錡證心情無損

 

姜濤與粉絲玩遊戲時擺出心形甫士，但他一臉尷尬。

 

　　日前姜濤在社交網上載隊友盧瀚霆（Anson Lo）的「浮屍醜照」，他強調對方沒有嬲︰「如果嬲就唔會repost（轉發）啦，我都驚佢嬲，所以之後有私下問佢。」此外，MIRROR早前登上美國《紐約時報》，姜濤表示︰「好開心，可以畀亞洲以外嘅人認識到我哋。」不過阿Dee就大呻︰「無ERROR份唔開心囉，我哋都為香港人帶嚟好多歡樂，可能我哋去到冰島、伊朗先有份。」問及隊友吳保錡近日的桃色新聞時，阿Dee即維護說︰「非常信任佢。（佢心情點樣？）好好呀，正常，問心無愧。（佢有無同你提過呢件事？）無呀，無嘢回應。」

 

轉載自: 晴報

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票