上周，林鄭喺風雨中，唔係，應該係「十號颱風」中公布最新一份嘅《施政報告》，畀大眾嘅感覺就係，政府運作一切如常，兼且有「新思維」去回應社會一啲深層次矛盾。不過剛剛嘅周日，市民仍然繼續雀躍咁出走彌敦道，喺油尖旺遊行表達對政府嘅不滿，亦當然，部分激進示威者繼續破壞行徑，市民嘅生活，並無因為《施政報告》而重回正常軌道。

　　早就已經預期，《施政報告》無乜港人有期待，公布一星期唔夠，激進社會運動已經將《施政報告》嘅曝光率幾近打到去零，特別係周日警方水炮車誤中尖沙咀清真寺大門、翌日林鄭聯同一哥盧偉聰登門道歉，已經足以令《施政報告》打入冷宮，個個都關注呢次罕有嘅道歉。

　　今次嘅道歉，對林鄭、對警方可以話係兩難。唔道歉，極可能得失伊斯蘭同埋外國嘅睇法，係一場牽連甚廣嘅公關災難；道歉咩，又會令到前線警員嘅士氣下降。最終林鄭選擇登門道歉，先撳住外媒把口，而警方並無再就事件向所有受影響人士或團體作一次公開道歉，甚至喺例行記者會上加多句：「我哋都等緊暴徒同我哋道歉」，作用都非常明顯，就係唔想前線警員有Hard Feeling。

　　但Hard Feeling就落晒去港人身上，無論係黃係藍，都覺得政府處理手法極大問題。對示威者來講，持續咁多個月嘅抗議示威，警方多次執法被質疑有問題（特別係7.21事件），只係希望警方或者政府可以好好交待，但係作為香港最大持份者（土生土長香港人），從來都聽唔到警方肯為自己執法問題向受警方直接影響嘅港人道一個歉，甚至政務司司長張建宗一個道歉，即惹嚟警隊前線大反彈，好似警方執法就係零瑕疵；對警方忠實支持者而言，今次破例道歉，警員正正被林鄭打咗巴掌，「兵荒馬亂」有意外就要道歉，咁前線仲點去執法？

　　一個道歉，再次睇到林鄭永遠都睇唔到問題嘅核心，仍然未睇清香港係邊度有病，甚至係令病情加重。究竟佢知唔知要喺邊度用藥先可以救返香港？Tina相信，今次道歉，會將林鄭民望進一步打入深淵。