【KOL風潮】天壤之別的待遇，到底是因為年資還是知名度？

　　近年KOL行發展得十分快，KOL宣傳慢慢變成眾多品牌公司嘅重要宣傳項目，主要原因係傳統廣告已經再難以接觸目標客戶，而且網上廣告嘅內容同策略亦開始變得流於表面，大眾開始失去興趣，加上大明星嘅收費十分貴，KOL先會變得越來越重要，所以亦因為咁好多人都希望成為KOL，增加收入來源。

特約廣告

　　對KOL嚟講最簡單直接嘅收益，就係利用自己嘅平台幫品牌公司出文章、相片及影片廣告。初入行、fans人數較少嘅KOL，一個廣告平均收益由幾百蚊至一、二千蚊不等。而香港較資深、最「top tier」嘅KOL，一個廣告收益平均可達五到六位數字，亦見過有國內明星級別嘅KOL，一個相片廣告已高達幾十萬。當然以上係個別例子，收益嘅高低其實涉及好多因素，除咗KOL嘅知名度、內容嘅精準度、KOL所屬嘅行業及類別等等，都可以令收益差距好大。

Google/Youtube Adsense 

　　有好多KOL都會有自己嘅Youtube頻道、網頁或網誌等，其實頻道或網頁只要符合Youtube或Google嘅收益資格，所有嘅瀏覽量都可以得到廣告收益分成。做法有幾種，簡單而言，瀏覽次數係最常用嘅指標。廣告收益通常會以每1000人瀏覽次數計算，而每1000人瀏覽量，KOL就能夠分得約1蚊美金收益。不同情況、不同頻道類型、頻道或網頁嘅年資，亦會令收益有所不同。有報道指，2019年Google Adsense全球收入最高係Mashable CEO Pete Cashmore，估計每月大約有1百萬美金嘅廣告收益。

產品贊助

　　其實KOL未必當產品贊助係收入嘅一種，因為收到嘅產品未必一定合KOL心水，所以呢個只係一個「barter deal」。另一方面，因為KOL無實質嘅金錢收益，有時亦未必會承諾任何事情，所以品牌公司唔一定會得到預期嘅效果。例如以前有品牌公司寄產品俾KOL試用，希望KOL可以幫手宣傳，但因為KOL要保持內容嘅質素同準確性，最終有機會由「唱好」變成「唱衰」。

　　KOL 近年開始變得泛濫，競爭越嚟越大，要做一個賺到錢嘅全職KOL，其實並非易事，要加把勁搵出自己個人之處並將其變成個人風格，先能夠有長遠嘅收入來源。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！ ► 立即行動